Tobias Ignatiussen angutaavoq takornariartitsinermik misilittagaqarluartoq; taanna piniartorsuuvoq piniartutullu inuussutissarsiornermi saniatigut Tunumi takornariarpassuit Issittumi piviusunik misigisaqartittarlugit.
Sermilik Adventuresimi piginneqataa, Line Kristiansen peqqissaasutut ilinniagaqarsimavoq, ukiulli tallimat matuma siornagut allamik misileerusulerami takornarialerinermik suliaqalerluni.
Tassa piginneqatigiit assigiinngilluinnartunik tunuliaqutaqartut, takornarialerinermilli misilittagaqarluartut, ilisimallugulu takornariaq asseqanngitsumik puigunaatsumillu qanoq misigisaqartinneqassanersoq. Aamma Nalik Ventures-ip tapersersiinneratigut Sermilik Adventuresip ukiukkut takornarianut neqeroorutai amerlanerulerput.
Maanna tassa taamaalilluni Tunumi misigisassarsiornissamik takorluuigaanni, aasaanera ukiuuneraniluunniit apeqqutaatinnagit – Sermilik Adventures qimussertitsinissamut, umiatsiamik angallassinissamut, apusiuserluni pisutsitsinissamut imaluunniit qamuteralammik angalaartitsinissamut piareersimavoq.
”Ukiukkut takornariartitsineq annertusarusukkatsigu qamuteralammillu nutaamik pisariaqartitsilluta. Taamaattumik Sermersuumi Inuussutissarsiornermut immikkoortortami siunnersorti Nalik Ventures-imut aqqutissiuussivoq. Taamaalilluta qamuteralammut aningaasartuutit affaannik tapiiffigineqarnitsigut aallartissinnaangorpugut”,Line Kristiansen oqaluttuarpoq.
”Suliamik nammineq ineriartortitsilluni nuanneqaaq. Tamanna isumalerujussuugami uagullu Nalik Ventures-imit tapiiffigineqarnitsigut takornariartitsinernut tunngasunik nutaanik ineriartortitsisinnaalerluta”, Line Kristiansen oqarpoq.
