Nic’s VVS januaarimi 2018-imi pilersinneqarpoq, Nic Rasmussen Grønlands VVS-imi suliffeqareersimalluni inuussutissarsiortutut namminersortutut inuunermik misiliiumallermat. Taamanimiilli sukkasuumik ingerlarsorsimavoq. Assut ingerlarsorluni.
Piginneqataassuteqarluni ingerlatseqatigiiffik Nic’s VVS Nuummi aallaaveqarpoq, suliffeqarfillu ullormit siullermiilli qummuinnaq ingerlasimavoq. Ullumikkut qulinik sulisoqarpoq, taakkualu naammattorsuarnik suliassaqarput.
”Taama ulapitsigiuaannarluni pikkunaqaaq”,Nic Rasmussen qiimmisaarluni oqarpoq.
Suliffeqarfiup siuariartornera nuannaarutigaa, nuannaarutigaalu VVS-ilerinermik suliffeqarfiup siunissami periarfissaanut aningaaserivik aamma Nalik Ventures suleqatigalugit aningaasalersorneqarsimanera.
Illuummut maskiinanullu aningaasat
Nic’s VVS maannamut inini attartukkani sulliveqarsimavoq, kisianni suliffeqarfiup alliartorneratigut inissaq annikippallaalersimavoq. Annerusumik pisariaqartitsisoqalerpoq, kisianni Nic Rasmussenip nassuerutigisariaqarsimavaa sukkasuumik alliartorneq aningaasanik akeqartoq.
Taava Nalik Ventures suliamut akuliuppoq. Suliffeqarfiup aallarterlaajusup aningaaserivik aamma Nalik Ventures peqatigalugit 12 millioner koruunit, maskiinanik nutaanik Nuummilu suliffissuaqarfiit ilaanni illuummik pisinissamut pisariaqartut, pilersinnissaat iluatsippaa.
”Maanna 900 kvadratmeterinik atorsinnaasaqalerpugut, maannamullu affaannaa pisariaqartikkatsigu, affaa attartortissimavarput. Tamanna suliffeqarfimmut isertitaqarluarsutaavoq, pisariaqalissappullu allilernissamut inissaqalersimalluta”, Nic Rasmussen oqarpoq.
Nalik Ventures-imiit taarsigassarsiat annaasaqariataarfiusinnaapput naammagittartuullutillu, imatut paasillugu, taarsigassarsiat suliffeqarfiup aningaasaqarnikkut inissisimaneranut pilersaarutaanullu atatillugu naleqqussarneqarlutillu ataqatigiissarneqartarput, suliffeqarfik utertitsilluni akilersuisinnaaniassammat, peqatigisaanillu ineriartornermik siuariartornermillu piviusunngortitsisinnaalluni. Aningaaserivik Nalik Ventures-imik suleqateqarluni Nic’s VVS-imut sulliviup illutassaata nutaap pisiarinissaanut aningaasaqarnikkut tunngavissanik pilersitsisimavoq.
”Tamatuma kinguneranik, maanna ineriartoqqinnissamut tunngavissaqalerpugut, niuerfimmilu inissisimaffitsinnik qulakkeerisinnaanngorluta. Alliartornitta tunngavigilluinnarpaa, Nuummi suliffeqarfinnut angisuunut sullissinissamut isumaqatigiissutinik sanasimanerput, taamaattumik suliaqarnitsinni aallunniarparput sullissilluarneq aamma pitsaasumik tunniussaqarneq pingaartitaralugit”, Nic Rasmussen oqarpoq.
