Takornarianut allanullu unnuiffissat

Avani Homes ininik, inissianik illunillu Uummannami attartortitsisarpoq

Kiffartuussisinnaanerup iluani ilinniagaqarsimavoq. Ukiuni arlalinni illoqarfinni allani najugaqartareerluni Anton Overballe Uummannamut angerlarpoq, maannalu ilaqutariit suliffeqarfiutaani Avani Homes Aps.-imi sulilluni. Taanna suliffeqarfiuvoq ininik, akunnittarfittut inissianik aamma illunik takornarianut allanullu piffissami sivikinnerusumi Uummannamiikkiartortunut attartortitsisarluni.

“Illuni 6-7-ini 30-nik siniffiuteqarpugut. Pilersaarutigaarpullu taakku akunnittarfinni inissianik nutaanik arfineq-marlunnik ilaniarlugit. Suliniuteqarnera akeqarami, ingerlatsiveqatigiiffiillu ilisimalluariarakkit Nalik Ventures-imut saaffiginnikkama, ingerlatatsinnillu ineriartortitsinissatsinnut tapiiffigineqarluta, suliniuterpummi taama isigineqarsinnaammat”, Anton Overballe nassuiaavoq.

Nalik Ventures-imit aningaasatigut tapiiffigineqarneq periarfissiisimavoq piviusorsiortumik missingersuusiornissaq, aamma kukkunersiuisumut aamma sanaartugassanik titartaasartumut, sanaartorfissamut akuersissummut, sanaartornissamullu akuersissutinut aningaasartuutinut matussutissaqartitsilerluni.

”Pingaarnertulli tapiiffigineqarnitsigut, Nalik Ventures-imiillu oqaloqateqarnitsigut aningaaserivitsinnut atorsinnaasumik suliniummik takutitsisinnaalerpugut”, Anton Overballe tikkuaavoq.

”Suliffeqarfiit allarpassuit assigalugit coronap matoqqatitsinerata nalaani kinguariaateqangaatsiarpugut, Nalik Ventures-imiilli tapiiffigineqarnitsigut anguniakkatta angusinnaanissaanissaa qaninnerulerparput”, Anton Overballe oqarpoq.