Nalik Venturesimi siulersuisut Peter Christiansen 14. November 2025 aallarnerfigalugu pisortatut atorfinitsissallugu aalajangerput. Peter CFO-tut 2022-miilli aaqqissugaanermi qitiusumik inissisimasuuvoq, marloriarlunilu pisortaagallartutut inissisimasarsimalluni. Aningaasaqarnikkut aqutsinikkut atuuffeqarsimanini, suliffeqarfimmut taamatuttaarlu inuussutissarsiornikkut suliffeqarfiup inissisimaneranut ilisimaarinnilluarnera tunngavigalugit Peter aqutsisunngornissaminut piareersimavoq.
“Peter ukiorpaalunni aaqqissugaanitta iluani pingaarutilittut inissisimasuuvoq, tamannalu tunngavigalugu tatigilluinnarparput Nalik Ventures piffimmut aalajangersimasumik aningaasaliinernut ineriartornernullu pitsanngorsaanissamut ingerlariaqqitsitsissasoq. Suliassami piumasaqaataasut aaqqissugaasumik tamakkiisumik isiginnittaaseqarneq najukkamilu atuutitsilersitsisarneq piiginnaasaqarfigai,” Taama siulersuisuni siulittaasoq, Miki Lynge oqarpoq. Avataaniit atorfinitsitsiniarnermut ingerlatsisoqareersoq siulersuisut ataatsimoortoq aalajangerpoq.
Atorfinitsitsineq pivoq piffimmi Kalaallit Nunaanni mittarfissat Nuummi, Ilulissani Qaqortumilu pillugit oqallinnerit pileruttornerini – takornariaqarnermi misigisassanillu suliassaqarfinni pisinnaassutsikkut iliuuseqartoqarnissaani inerisaanissamilu. Kapitalip tullia tassaavoq ineriartortitsinissamut sinaakkutit pitsanngorsarnissaat: umiatsianik angallassisartut, camp-it, akunnittarfiit inuussutissarsiornikkullu tunngavinni tikeraartussat amerliartornerini tigusisussat.
Isumassarsiamiit piviusunngortitsinermut – najukkamilu allannguineq
Nalik Ventures suliniutinut angisuunut, matumani akunnittarfinni suliassaqarfinni attaveqaasersuutinilu aningaasaliinissamut orniginarsaanissamut suliniuteqarpoq. Tamanna nutaamik eqqarsarnermik, attaveqaqateqarnermik pitsaanerusunillu sinaakkuteqarnermik piumasaqaatitaqarpoq, tassa tassaneqqissaaq suliffeqarfiup siunissami inissisimavissani takussavaa.
“Nalik Ventures tapersiinermik taarsigassarsinermillu taamaallaat suliaqarfiussanngilaq, isumassarsianik piviusunngortitsiviussaaq. Isumassarsiat sumiiffimmi aalajangersimasumik allannguiviusinnaasut, inuussutissarsiorfillu periarfissagissaarnerpaaffiani pitsanngorsaaqataalluni,” Peter Christiansen oqarpoq.
Suliniutit pilersaarusiallu aalajangersimasut aqqutigalugit Nalik Ventures suliffeqarfimmik aallartitsisoqarnissaanut pisariillisaasarpoq, tamatumalu saniatigut aningaasaliinernut annertuunut aalajangiinissamut tunngaviliinissap nukittunerusumik pinissaanut suliaqaqataasarluni. Aallarnisaasut ataasiakkaat annertuumillu suliniuteqartut tamarmik inissaqartinneqassapput. “Peqataarusuppugut sumiiffiillu periarfissallit, illoqarfiit anginerusut kisiisa pinnagit aallukkusullugit inuussutissarsiorfiit suliffissanik pilersitsiviusut pitsanngorsaaqataavigerusuppavut,” naggasiivoq.
