Ukiorpassuit matuma siornagut aallartippoq. Taamanikkut Elna Jensenimut angerlarsimaannartuuneq savaatilimmullu nuliaaneq naammannginnammata, saniatigut suliaqartariaqarluni uinilu vandrerhjemimik mikisumik pilersitsipput, 2013-imilu illuaqqanik takornarianut Kujataani misigisassarsiorusuttunut unnuiffissanillu amigaateqartunut illuaqqanik nappaallutik.
Sapiitsuliortoq nerinngikkuni iminngikkunilu atorsinnaanngilaq, taama oqaasinnaaqarpoq. Tamanna Kujataani asimut nalissaqanngitsumut pisullutik takornariartunut mattusuunut aamma atuuppoq Arnaq suliumatooq sulianillu ingerlatsiumatooq taava qanoq iliorpa? Savaateqarfimmi Qassiarsummi Narsarsuup eqqaaniittumi 2019-imi Cafémik pilersitsivoq ammarlugulu.
”Kaffisorniartarfimmik ammaanissamut aningaasaliissutigineqartussat nammineerluta pigisimanngilagut. Caféliassarput piviusunngortinniarlugu Nalik Ventures-imit iluarsaassinermut atortunullu aningaasartuutit affaat matussuserneqarmata piviusunngortissinnaalerparput”, Elna Jensen oqaluttuarpoq, taanna Air Greenlandip timmisartuini siornatigut saqisuusimagaluarpoq.
”Coronap matoqqatitsinerata kingorna aallartilluarpugut, maannali septembarip naanerani ukiornissaanut matusussaalluta. Tikerartoqarnerpaaffipput juunimit septembarimut sivikippoq ulapiffioqalunilu. Piffissami tassani maani suliassanik agguataarineq erseqqilluinnarpoq – takornariat, Café, vandrerhjemmi illuaqqallu uanga isumagisaraakka, uimalu savat narsaatillu isumagisaralugit. Namminersorluni inuuneq uatsinnut inooriaasinngorsimavoq”, Elna Jensen oqarpoq.
