Ludvig Andersen Rosingimut Aasianneersumut ullup unnuarlu nalunaaquttap akunneri 24-t naammanngingajattarpulluunniit, angutaavormi ulapputissarpassualik.
Suliffeqarfik kisermaallugu ingerlanneqartoq Pukia ingerlataraa aamma suliffeqarfinnut ingerlatseqatigiinnullu kabelinik attaveqaasersuutinik ikkussuilluni ulapputissaqartaqaluni. Taamaattorli Ludvig innaallagialerisutut ilinniagaqarsimasup aallarnisaasutut pilersaarutini ingerlalluaraluartoq, nutaamik anguniagassaminik aalajangiussereersimavoq: innaallagissamik ikkussuisartutut allagartartaarusuppoq.
”Suliffeqarfiutiga ingerlalluarpoq, aamma ilaatigut Qasigiannguit Nukissiorfianiit suliakkerneqarnikuuvunga”, Ludvig Andersen Rosing oqaluttuarpoq.
Suliffeqarfiutini pilersikkamiuk ilitsersorneqarnissaminik tapiiffigineqarnissaminillu pisariaqartitsisimavoq. Tamanna Nalik Ventures-imit pissarsiaraa, taamaalillunimi suliffeqarfik aallartissinnaajumallugu atortunut atugassami 100.000 koruunit affaannik tapiiffigineqarsimavoq.
Tamanna sioqqullugu aallarnisaasutut Nuummi pikkorissarpoq, taamanimi Aasianni ikiortissaqaranilu ilitsersuisussaqannginnami. Namminersortutut aallarterlaatut aallarnisaasutullu aqqusaagassat pisartut aqqusaaqqaartariaqarsimavai.
”Qujanartumik ingerlalluarpunga, aqqutaanili qummut ammullu ingerlavoq aammalu pakatsinartoqarsinnaasarpoq. Maanna suliffeqarfik ingerlappara saniatigullu innaallagissamik ikkussuisartutut allagartartaarniarlunga ilinniagaqarlunga. Tamanna qarasaasiakkut pisarpoq, aamma ilinniagassaqartaqaanga. Tamatumunnga atatillugu ukiumut arfinileriarlunga ulluni pingasuni Danmarkimiittarlunga. Tamanna sakkortuvoq, pisariaqarlunili suliffeqarfiutiga innaallagialerinermik, qarasaasialerinermik attaveqaasersuinermillu ingerlatatut ineriartortissagukku”, Ludvig Andersen Rosing oqarpoq.
