Nalik Ventures A/S aaqqissuusseqqinnermiileruttorpoq. Sinerissami takornariaqarnerup nutaaliorlutillu suliniuteqarusuttunut samminerulluni suliniuteqarnialerpoq. Siunertaq allanngorneqanngilaq tassalu peqqissunik, nukittuunik imminullu akilersinnaasunik suliffeqarfinnik aallarniisarnissaq, aningaasarsiorluartunik inuiaqatigiinnullu ineriartortitseqataasussanik.
Nalik Ventures A/S siulersuisui allannguinissaq eqqarsaatiminniitillugu pisortanngortussamik nassaarniarsimapput siunertamut naleqquttumik tunuliaqutalimmik. Marts naasoq pisortaanerusimasoq suliunnaarmalli atorfik Inuttassarsiuullugu aallartinneqarpoq, pingaartinneqarsimavorlu nunatsinnut pissutsinik ilisimasalimmik inuttalerneqarnissaa Isumaqatigiissutigiissuteqarfigineqartorlu Thomas ”Tyt” Mogensen, piumasaqaataasunut tulluummat 1. oktober 2023 aallarnerfigalugu Nalik Ventures A/S-mi pisortaanertut aallartissaaq.
”Assorsuaq iluarisimaarparput Tyt suleqatiginissallugu isumaqatigiissuteqarfigisimagatsigu. Ujartorsimasarput tassaasimammat inuk Kalaallit Nunaannut inuussutissarsiornikkut ineriartortitsinermik taamatuttaarlu inuiaqatigiinni pissutsinut annertuumik ilisimasaqartoq. Piginnaasat taakku Tyt-mi takusimavagut, qilanaaraaralu inuiaqatigiinnut nuannaarutaasumik iluaqutaasussamillu ineriartortitseqatigilernissaanut,” taama oqaaseqarpoq Miki Lynge, Nalik Ventures A/S siulersuisuini siulittaasoq.
Thomas ”Tyt” Mogensen suliffinni assigiinngitsuni aningaasaqarnermik inuussutissarsiuteqarnikkullu inerisaanermi suliaqartarsimavoq. Ilaatigut Sulisitsisuni siunnersortaasimavoq BankNordikimilu erhvervsdirektøritut atorfeqarsimalluni. Maj 2021-miilli namminersorluni suliffeqarfiuteqalersimavoq, Tyt Consultingimik ateqartumik, tassani suliffeqarfiit ikinngeqisut namminersortut siunnersortaaffigisimavai, inuussutissarsiornermi aningaasaqarnerup, aqutsinerup aningaasaqarnerullu tungaatigut saniatigooralugulu Foreningen Grønlandske Børn siulersuisuini siulittaasutut inissisimalluni. Tyt-ip Nalik Ventures A/S-mi pisortatut unammilligassat nutaat qilanaarutigai.
”Namminersortutut sulisimanera nuannarisimaqaara, timikkut misigalugu, qanoq namminersuuteqarluni pissanganartigisoq, ineriartornera aqullugu. Taakkorpiaat misilittagarilikkakka massakkut atorfigiligassanni nalilittut iluaqutigilluarumaarpakka, nuna tamakkerlugu aallarnisaarusuttut suliffeqarfinnillu nutaanik pilersitsiortorusuttut sullitilerukkit ineriartortitseqatigilerlugillu,” taama Tyt oqarpoq itisilerlugulu ilassuteqarluni;
”Nalik Ventures A/S ukiorpanngortuni malinaaffigisimavara, takunikuullugulu qanoq kalaallit Nunaanni inuiaqatigiinnut inuussutissarsiornikkut ineriartuutaatigisimanersoq. Taannalu ineriartorsimaneq ataqqivara, tulluusimaarutigalugulu siunissami peqataaffigisinnaanngorakku, immikkullu upperaara, takornariaqarnerup tungaatigut suliffeqarfinnik puttussuuttoqalissasoq. Tassani aallaavigaakka mittarfissuit piulertussat, takornarissanik amerlanerusunik tikittoqartalernissaanut aqqutaasussat,” taama Thomas ”Tyt” Mogensen oqaaseqarpoq naggasiillunilu:
”Aallarniutigaluguli qilanaaraara Nalik Ventures A/S-mi suleqatigiligassama naapinnissaat. Maniguullunga suliassaq aallartissavara qilanaarpungalu nunatsinni inuussutissarsiornikkut ineriartortitsineq pitsaanerusunik sinaakkusersulernissaanut.”
Nalik Ventures A/S siulersuisui sinnerlugit,
Inussiarnersumik
Miki Lynge
Siulersuisuni siulittaasoq
