Nalik Ventures ingerlatseqatigiiffiusimasut pingasut uku kattunneqarnerisigut 2022-imi pinngortinneqarpoq; Greenland Holding, Greenland Venture aamma Innovation Greenland.
Siuarsaanermut inuussutissarsiutitigullu ineriartortitsinermut qaffassaaqataanissaq, aammalu malunnaatilimmik kalaallit piginneqataanerat ineriartornermillu iluaquteqarnissaannik qulakkeerinninnissaq suliffeqarfiup immikkoortortallip Nalik Venturesip pingaarnertut suliassaraa. Nalik Ventures A/S ingerlatseqatigiiffiup qullersaqarfigaa, inuiaqatigiillu pigisaannik annertuunik naleqartunik ingerlatseqatigiiffinnut toqqakkanut Kalaallit Nunaannut attuumassuteqartunut aningaasaliinikkut ingerlatsisuuvoq. Aningaasaliinermi iluanaarutit siuarsaaqqinniarluni aningaasaliissutinut atorneqartarput, taamaalilluni siunissami aningaasaliinernut annertunerusunut, kalaallinik pigineqartunik suliniutinullu nunat akornanni peqataanissamut tunngavimmikkut isumannaallisaasoqartarpoq.
Nalik Capital A/S-ip inuussutissarsiuteqarnikkut ineriartorneq unammillerluarsinnaasoq aningaasaliissuteqarnikkut aningaasalersuinikkullu siuarsartarpaa – kalaallillu piginneqataanissaat aammalu siuariartornikkut ineriartornikkullu pissarsiaqaqataanissaat taperseeqataaffigisarlugu.
Nalik Startup A/S Naalakkersuisut inuussutissarsiornermut siuarsaanermi aaqqissuussinerinut allaffissuussisuuvoq, ingerlassanilu siunnersortitut aallarniisartutullu aallarnisaanermik inuussutissarsiutitigullu ineriartornermik siuarsaaqataasussatut isumassarsiorfiulluni suleqataasussatut peqataasarluni – minnerunngitsumik namminersortut suliffeqarfiillu mikinerit akornanni.
Taakkua saniatigut EU-p programmiisa, Kalaallit Nunaannit qinnuteqarnikkut peqataaffigineqarsinnaasut nakkutiginissaat Nalik Venturesip suliassaasa ilagaat. Taakkununnga atatillugu suliffeqarfiit, kattuffiit pisortalluunniit suliffeqarfiutai peqataanissaminnut soqutiginnittut Nalik Venturesip siunnersortarpai – qinnuteqarnerillu annertuut immersorneqalersillugit ikiuuttarluni.
