Fraud Management Politik

Nalik Ventures A/S-ip inatsisilerinikkut ileqqorissaarnikkullu qaffasissumik pitsaassusiliinissaq pingaartitaraa. Tamannalu sulisunut, siulersuisuni ilaasortanut aammalu siunnersortinut attuumassutilinnut tamanut atuuppoq. Peqquserlunnerit pinngitsoortinnissaat taamatullu peqquserluttoqassagaluarpat paasiniaanerni ikiuuttoqarnissaani ingerlatsiviup ingerlariusaata ineriartortinneqarnissaanut, Nalik Venturesip Peqquserlunnernut akiuiniarnermi malittarisassiai ikorfartuutaasussaapput.

Fraud sunaava?

Peqquserlunneq tassaavoq allat aningaasatigut iluanaarnissaannik siunertaqarluni eqqunngitsumik peqquserluttuliorluni iliuuseqarneq, aammalu paasissutissanik pingaarutilinnik tunniussinnginnikkut aqutsisut, atorfillit allalluunniit attuumassuteqartut atugassaraluinik aningaasaqarnikkut nalunaarusianut sunniuteqartitsineq.

Assersuutit:

Peqquserluttuliorneq, akiliilluni peqquserlutsitsineq, akilerneqarluni isertorluni paasissutissanik tunniussuineq il.il.
Tillinniarneq
Uukapaasiarinnilluni paasissutissanik mianernartunik pissarsiniartarneq
Kontut normuinik tassanngaannartumik allanngortitsineq
Akiligassiissutit akiliiffissalluunniit ilumuunngitsut
Akiligassiivallaarneq
Nammineq inuttut atugassanut Mastercardinik akiliuteqarluni atuineq
– Sulianut attuumassuteqanngitsunik nammineq inuttut atukkanik utertitsineq

Aqutsisut pimoorussamik sulinerat

Ingerlatsivimmut attuumassuteqanngitsumik akuerisamillu suliarineqartumik, Nalik Venturesip peqquserlunnermut akiuiniarnera pillugu ukiumoortumik nalunaarusiamik siulersuisut tigusaqartarput. Aningaasaqarnermut pisortap suliassaq taanna tigusarpaa, tamannali aamma qullersaqarfimmit aamma tiguneqartarpoq, suliffeqarfik tamaat isigalugu ingerlaavartumik peqquserlunnerup akiorneqarnissaanik suliaqartoqarnissaa qulakkeerniarlugu.

Siaruarterineq

Aqutsisut, atorfillillu missingersuutitigut akisussaaffillit aammalu tunniussisinnaatitaasut tamarmik, akisussaaffeqarfimminni malittarisassanik malinninngitsoqaratarsinnaaneranut misissuisarnissaminnut akisussaaffeqarput.

Nalik Venturesimiittunut tamanut malittarisassat atugassanngugaapput, immikkulli ilaatigut inunnut akisussaaffilinnut ukununna atugassiaallutik:

– Pisiortortartunut, matumanilu aamma siunnersortinik atuinissamik aalajangiisartunut
– Taarsigassarsititsisartunut
– Aningaasaliinermik akisussaasunut
– Taxanik akiliutinillu atuisartunut
– Kontulersuisartunut
– Akiligassanik nakkutiginnittunut
– Akiligassanut akuersisartunut
– Missingersuutinut akisussaasunut
– Aningaasanik nuussisartunut
– Mastercardinik atuisartunut
– Isumaqatigiissusiortartunut atorfinitsitsinermilu isumaqatigiissusiortartut matumani ilanngullugit

Malittarisassatigut suut tamavimmik sillimaffigineqarsinnaanngillat, taamaattumik atorfilittat ataasiakkaarlutik tatigineqarnikkut imminermut isumalluutit akisussaaffigisanngortitaasimasut pillugit, peqqusersuitsumik pissuserissumillu akisussaassuseqarlutillu mianersuussisussaatitaapput.

Tunngaviatigut suliffeqarfimmik ingerlatsinerni tamani peqquserluttuliorsinnaanermut ilimanaateqarsinnaagaluaq, peqquserlunneq ima paasineqarsinnaavoq:

– Pissusissaanngitsumik iliuuseqarneq
– Pissusissaanngitsumik iliuuseqarnermik pasitsaassaqarneq

Ukunani:

Artorfillit
– Sullitat
– Siunnersortit
– Pisiortorfiit
– Attaveqarfigineqartartut allat

Aaqqissuussaanermi inissisimaffik sulisimanerulluunniit sivisussusaa apeqqutaatinnagu misissuinerit naammassineqartartussaapput. Pisuutinneqartullu inatsisitigut sinaakkutit iluanni aammalu atorfininnermut isumaqatigiissutit atuuttut iluanni kinguneqartitsivigineqartussaapput.

Aqutsisut akisussaaffii

Suliffeqarfimmi peqqusersuilluni, ammalluni pitsaasunillu siunertaqarluni avatangiiseqarnissaq siulersuisut, qullersaqarfiup aqutsisullu allat qulakkiigassaraat. Malitsigisaanillu ingerlatsivimmi peqquserluttuliorniarnerit pinngitsoortinniarnissaannik aammattaarlu pasitsaassisoqartillugu kinaassusersiornertaqanngitsumik sukumiisumik misissuisitsisarnissanut pisussaaffeqarput.

Pasitsaassat tunngavilersukkat tigooraannarnagit, taamatuttaaq pasitsaassat tunngavillit nalunaarutigineqartarnissaat kajumissaarutigineqartassaaq. Nalunaarutiginninnerillu atorfilimmut nalunaaruteqartumut ajornartorsiutinngortinneqaratillu ajoqutinngortinneqartassanngillat.

Nakkutilliineq – Malittarisassat aamma Ingerlatseriutsit

Malittarisassat uku nakkutilliinermut ingerlatseriutsinullu pioreersunut, kiisalu Ukiumoortumik nalunaarusiamut atatillugu ingerlatsiviup naatsorsuutaasa attuumassuteqanngitsumit kukkunersiorneqartarneranut peqquserlunnerlu akiorniarlugu nalunaarusiortarnermut ilanngussaavoq.

Atorfilinnut saqqummiunneqarnera

Atorfillit tamaasa peqatigalugit peqquserlunnermik akiuiniarnermi malittarisassat akuttunngitsumik eqqartorneqartarput. Sulisunut ataatsimiisitsinerni toqqakkani, oqaluuserisassat aningaasaqarnermut pisortamit qaqilerneqartarput, matumani sammisami ilisimasaqassuseq qaffassarniarlugu aammalu peqquserlunnissamut aarlerinaatit tamanit ilisimaneqalernissaat qanorlu peqquserlunnerit pinngitsoortinneqarnissaannik ileqqoqalernissaq siuarsarniarlugu.

Malittarisassaq manna ukiut tamaasa misissorneqartartussaavoq

Nalik Ventures A/S-imi pqquserlussinnaanermut aarlerinaatit minnerpaaffianiitinneqarnissaat aammattaaq ukkatassanut ilaavoq, taamaattumillu ukiut tamaasa suliffeqarfiup iluani kukkunersiuisoqartillugu malittarisassat nutarterneqartartussaapput.