”Nutaarluinnaasimavoq, taamalu suut tamaasa nammineerlunga isumagisariaqalerlugit”. Isikkerisoq Naja Olsen namminersorluni aallarnisaasutut aallarteqqaarnini pillugu taama oqaluttuarpoq.
Nammineerluni suliffeqarfiutitaarnissani ilungersuutigiumallugu aalajangiukkamiuk annikitsualutsigut aallarnisareersimavoq. Atortussarpaalunnilli amigaateqarluni isikkerisutut ilinniarsimasutut suliffimmik ingerlatsissaguni pisariaqartitaminik. Tamatumunnga atatillugu Arctic Circle Businessip siunnersuineratigut ilitsersuineratigullu Nalik Ventures-imik pitsaasumik attaveqalerpoq.
”Nalik Ventures-ip atortussatut pisariaqartitama affaasa akilernissaat neqeroorutigaat, affaalu nammineerlunga ileqqaarnikkut katersereersimallugit. Taamaalillungalu aallartilluarlunga”, Naja Olsen oqarpoq, namminersortunngunnginnerminilu peqqinnissaqarfimmi atorfeqarsimavoq.
“Inunnik sullittakkanik sullitaqarninnik aallartilluarpara. Aamma Steno Diabetes Centerimut sukkortut Maniitsumiittut, Sisimiuniittut aamma Kangerlussuarmiittut isigaasa suliarisarnissaannik isumaqatigiissusiorpunga. Kingusinnerusukkut avannaaliartussaavunga. Aamma Stenomut isumaqatigiissut aallarnisaasutut nutaanerusutut uannut pingaarutilittut tunngaviuvoq”, Naja Olsen erseqqissaavoq.
