Nalik Ventures A/S 2025-mi 46,5 mio. koruuninik sinneqartooruteqarluni angusaqarpoq. Angusat missingersuusianit annertunerupput nalilinnillu qaffassaanerni suliffeqarfiup aktianit aningaasaliissutinik katersukkanit ingerlatsinermeersuullutik.
Siulersuisut angusat iluarisimaarpaat.
Periarfissat nutaat
Kalaallit Nunaanni ukiuni makkunani suliat annertunerusut, attaveqaasersuutit pitsaanerusut kiisalu nunanit tamalaanit annertusiartortumik soqutiginnittunik misigisaqarfiuvoq.
Tamanna allisaanissamut inuussutissarsiornikkullu inerisaanissamut nutaanik periarfissiivoq. Periarfissalli namminneerlutik nalittorsarneq ajorput.
Suliffeqarfinngortinneqassapput, aningaasaliissutigineqassapput, suliffissanik pilersitsiviussapput kiisalu najukkani nalittorsaassallutik.
Nalik Ventures matumani inerisaaqataassalluni inissisimassaaq.
Tamanna tunngavigalugu 2025-mi suliniutigisanut annertusaanissamut suliffinni ineriartortitsinissamut aallarnisaasunullu, aningaasaliinernut periarfissiinissaq, paasisanik nutaanik aallernermik suleqatigisassallu pilersinnissaannut tunngatillugu Kalaallit Nunaanni periarfissat annertusaaninngortinnissaannut iliuusissat pisariaqartut suliffeqarfiup suliniutigisimavai.
“Piffimmi siornatigorniit periarfissaqarnerusumiippugut. Periarfissalli namminneerlutik naleqalersitsinavianngillat. Suliffeqarfiit naleqalersitsisuussapput. Taamaammat ineriartornerup pilersinneqarnissaanut suliffeqarfiit Kalaallit Nunaanneersut periarfissanik tigusinissamut tatitussuseqarnissaannik siunnerfeqarluta suliniuteqarpugut” Miki Lynge, Nalik Venturesip siulersuisuini siulittaasoq oqarpoq.
Aallarnisaasunik annertunerusumik samminninneq
Ukiup ingerlanerani Nalik Ventures nunani tamalaani suleqatigisat annertusaavigai, tassani ilisimasat, misilittakkat aammalu aningaasaliinissamut periarfissat qitiutinneqarput, taakku Kalaallit Nunaanni inuussutissarsiornermi ineriartornerup tapertaaffigisinnaammassuk. Tamatuma saniatigut kommunit inuussutissarsiorfiillu suleqatigineri nukittorsarneqarput, matumani qulakkeerniarlugu nuna tamakkerlugu suliffeqarfiit aallarnisaasullu siunnersorneqarnissaq, taperserneqarnissaq aningaasaliivigineqarnissarlu pisariinnerusumik periarfissarilissagaat.
Aallarnisaaneq immikkut isiginiarneqartut ilagisimavaat. Ukiup naanerani aallarnisaasunut ingerlatsinerup IKUMA-p pilersaarusiorneqarnera naammasivoq, qinnuteqarfissarlu aallartinneqarluni. Ingerlatsineq 2026-mi pilersaarutit malillugit ingerlavoq, suliffeqarfiit aamma aallarnisaasut – ilaatigut takornariaqarnermut tunngatillugu, attaveqaasersuutit pitsaanerusut malitsigisaanik periarfissiisussap ineriartortinnissaannut tapertaassaaq.
EU-mi programmi Capacity Facility-p suliarinera pilersaarutit malillugit ingerlavoq. Aningaasat siunnersuinermut, suliffeqarfinnik inerisaanermut aammalu najukkani piginnaasat pitsanngorsarnerinut atorneqarput, programmilu 2026-mi naammassineqassasoq naatsorsuutigineqarpoq.
“Kalaallit Nunaat ineriartortillugu suliffeqarfiit aamma ineriartornissaat pingaaruteqarpoq. Uagut suliassaraarput ilisimasanut, piginnaasanut, aningaasaliinissamut aammalu suleqatigisanut nuna tamakkerlugu sulifffeqarfinni suliffinnilu tamani periarfissaneersunik nalittorsaanissamut periarfissiissalluta,” Miki Lynge oqarpoq.
2026-mi Nalik Venturesip suliffeqarfinnik inerisaanermut, aallarnisaanerup pitsanngorsaaviginissaanut aammalu ilisimasanut, aningaasaatinut kiisalu suleqatigisanut tunngatillugu periarfissiilluni suliani nangissavai. Allisaaneq taamaallaat siunertaanngilaq – siunertaavorli qulakkiissallugu Kalaallit Nunaanni alliartornerup annerpaartaa suliffeqarfinnit kalaaliusunit pilersinneqassasoq.
Ukiumoortumik nalunaarut tamaat uani atuarneqarsinnaavoq: Nalik Ventures Ukiumoortumik Nalunaarut 2025
