Suliffeqarfimmik aallarniilerpit?
Takornariaqarnermut attuumassutilimmik suliffeqarfimmik isumassarsiaqarpit?
Taava maanna periarfissaqarputit!
Inissat quliinnaapput!
IKUMA takornariaqarnerup tungaatigut aallarnisaasunut nittartakkatigut
ingerlanneqarnissaanut peqataagit. Misilittagalinniit avitseqateqassaatit/siunnersorneqassaatit, attaveqaateqalissaatit aammalu suliffeqarfivit inerisarnissaanut ikorfartuisussanik ikorfartorneqarlutit.
Massakkoqqissaaq peqataasussanik qulinik tunniusimasunik, nassaarsiullaqqissunik anguniagaqarumasunillu ujartuivugut. Isumassarsiatsialaqarpit piviusunngortinnissaanullu piumassuseqarlutit? Taava qinnuteqarit.
Nittartakkatigut ingerlatsineq
Ingerlatsineq nittartakkatigut ingerlanneqassaaq, taamaasilluni sumiikkaluaraanniluunniit peqataasoqarsinnaalluni. Ilitsersuussineq, ataatsimiinnerit saqqummiinerillu nittartakkatigut ingerlannerisigut, peqataasunut tamanut ilisimasassaq, avitseqatigiinneq aammalu sakkussanik pissarsiffiussaaq – illoqarfinniittunut nunaqarfinniittunullu.
Peqataasutut suut pissarsissutigissavigit?
IKUMA qaammatit qulit ingerlassaaq aammalu februar 2026-mi aallartissalluni. Aallarnisaasunut nunatta sineriaani takornariaqarnikkut isumassarsiaminnik inerisaaniartunut ingerlanneqarnissaa tulluarsagaavoq.
Attavissaq
Peqataasutut attavissaq aaliangersimasoq avitseqatigisinnaallugulu siunnersortigisinnaassavat, naammassinissallu tungaanut suliffeqarfivit nukittorsarnissaanut malinnaaviginissaanullu malitsigissavaatit.
Nittartakkatigut naapinnerit
Suliffeqarfimmik ineriartortitsinissamut nittartakkatigut ataatsimiinnernut saqqummiinernullu attavilerneqassaatit, aallarnisaaaninnut ikorfartorneqarneralutit taamatuttaarlu isumassarsiavit ineriartorteqqinnissaanut nukittoqquteqassallutit.
Immikkut ilisimasallit
Immikkut ilisimasalinniit piumasaqaatinut aammalu aningaasaqarnikkut ilitsersuunneqassaatit taamaasillutit suliffeqarfiutinnut tunngassutilinnik aaliangigassaqartillugu pisortatigoortumik piumasaqaatinut nalunaarsuisinnaassallutit.
Akeqanngitsumik nittartagaq!
Peqataasut tamarmik akeqanngitsumik nittartagaliuunneqarnissaminnut tunineqassapput, suliffeqarfiup professionaliusumik avammut saqqumilaartinneqarnissaanut aammalu pisisartunut suleqatissanullu ajornannginnerusumik apuussinissamut periarfissaqalissallutit.
Ilisimasalinnik attaveqarneq
IKUMA ingerlanneqarnerani tarrarsorfigineqarsinnaasunik, ikorfartuisussanik periarfissatsialannillu tikkuusseqataasinnaasunik matunik aammaassaaq, taakkulu aallarnisaasuussapput immikkullu ilisimasallit.
Ingerlatsinissamut qanoq piffissamik atuissavit?
Naatsorsuutigisinnaavat IKUMA ingerlanneqarnerani piffissamik atuinissat (piffissaq allannguuteqarsinnaasassaaq). IKUMA qaammatini qulini ingerlanerani piffissamik atuiffissatut naatsorsuutigineqarsinnaasut ataani takusinnaavatit:
- Ulluinnarni ulluunerani (8-16) nalunaaquttap akunneri 40-45-t. attaveqaatitigut webinarit, suleqatigiiaannerit siunnersorneqarlunilu ataatsimiinnerit.
- Webinarit attaveqaasersorfissat isumassarsiorfissallu: Nalunaaquttap akunneri qulit ulluinnaat avataatigut (unnukkut/sap. ak. naanerini)
- Aaqqissuussat (Events): Ullut sisamat/arfineq-marluk
- Namminersorluni suliaqarneq: (angerlarsimalluni suliassat, pilersaarusiornerit il. il.): Ineriartornissamut nalunaaquttap akunneri amerlanerusut aamma immikkoortinneqassapput – qanoq pisariaqartitsitiginersutit suliallu annertussususaa apeqqutaapput.
- Tamatuma saniatigut Nuup avataani najugaqaruit Nuuliarnissat pisinnaassaaq: Ullut tallimat/arfineq-marluk
Toqqartuineq qanoq ingerlanneqassava?
Anguniagaraarput IKUMA ingerlanneqarnerani annerpaamik pissarsissutigalugu takornariaqarnermi aallarnisaasut / isumassarsiallit angusaqarusunnerpaat piumanerpaallu nanissallutigit. Toqqaaniarnermi suleriuseq ammasumik ingerlanneqarnissaa toqqarsimavarput, peqataaniarnissannut nalornissuteqannginnissat anguniarlugu.
Qinnuteqarneq
Qinnuteqarnisamut periuseq
Qinnuteqaatit allaganngorlugu nassiutissavat. Qinnuteqaatip aalajangersimasumik iluseqarnissaanik piumasaqaatitaqanngilaq – nammineerlutit ilusaa takissusaalu aalajangissavatit.
Qinnuteqaammi paasissutissat tassaaginnassapput piumasaqaatit aalajangiussat tunngavigalugit illit suliniuvit nalilersorsinnaanissaanut paasissutissat.
Qinnuteqaatit ukuninnga imaqassaaq:
- Tunngaviusumik isumassarsiaq: Suliffeqarfimmut isumassarsiavit nassuiaataa ersarissoq piumassuseqarfiusorlu
- Suliffeqarfiup inuttaa/suleqataasut piginnaasaat: misilittakkat aamma piumassuseq
- Tuniniaanissamut periarfissat: Sullinniakkanut pisariaqartitat, unammillertit alliartornissamullu periarfissat
- Aallartisarniarnerup ingerlarnga: Aallartisarniarnerup ingerlarnga ilutigalugu piffissap qanoq annertutigisumik atorneqassaneranik takorluuineq
- Aningaasaliinermut pilersaarutit: Aningaasarsiorfiit massakkut ingerlasut imaluunniit naatsorsuutigisat
- Siunissamut pilersaarutit: Siunissamut takorluukkat, pilersitat/sullissinerit nutaat aamma/imalt. tuniniaavissat
- Najukkami tunniussat: Suliffeqarfik qanoq najukkami tunniussaqassanersoq
Peqataanissamut piumasaqaatit
Peqataanissamut toqqarneqarniaraanni suliffeqarfik qinnuteqartullu ataaniittut tamakkersinnaassavai:
- Takornariaqarneq, sullissineq, misigisassat assingusulluunniit immikkut sammissavaat
- CVR-nr. annerpaamik qaammatinik 12-nik pisoqaassusilik pigissavaat
- Kalaallit Nunaanni najugaqassaaq
- Kalaallisut aamma/imalt. danskisut oqalussinnaassaaq
- Internetsimut, qarasaasiamut/angallattakkamut, mobilimut attaveqassaaq office-pakkeqarlunilu immaqaluunniit atortut assingusut pigissavai.
Qinnuteqaat ima nassiunneqassaaq:
- Qinnuteqaatit allaganngorlugu suliariuk (soorlu Word imaluunniit PDF-fil)
- Qinnuteqaat uunga nassiuguk nalik@nalik.gl kingusinnerpaamik 31. december 2025
- Ullualuit iluanni tigusimaneranik nalunaarfigineqassaatit
Qinnuteqaatip nalilersornera
IKUMA pitsaasumik siunertaqartumillu ingerlanneqarnissaa qulakkeerniarlugu nalilersuinissamut uuttuutit arlallit pilersissimavagut. Naililersuutit atornerisigut aallarnisaasut isumassarsiaasa tunngavissaqarluarnerat aammalu piumassuseq pisariaqartoq pigineqarnissaanik toqqaanissatsinnut qulakkeerinneqataasussaapput. Soorlu inuussutissarsiutitut isumassarsiaq, piumassuseq aammalu sumiiffimmi ineriartortitseqataasinnaaneq.
Naliliinermut piumasaqaatit
Qinnuteqaatip killiligaanerata kingorna toqqagassanik aalajangiisartut qinnuteqaatit tamakkerlugit misissussavaat piumasaqaatit uku tunngavigalugit:
-
- Niuernissamut periarfissagissaarneq: Isumassarsiaq ineriartornissamut periarfissaqarluni suliffeqarfinngorsinnaava (aningaasanik kaaviaartitaqarlunilu sinneqartoorluni?)
- IKUMA neqeroorutaanut naleqqersuussineq: Isumassarsiap siunnerfia piumassuseqarfialu sammisassap pilersaarusiaata siunertaanut imarisaanullu tulluarpa?
- Niuerfissamut paasinninneq: Pilersaarusiat piviusorsiorpalaarlutillu tutsuiginarpat?
- Suliffeqarfiup inuttaa/suleqatai: Qinnuteqartoq/-tut piginnaasai, piumassusai ilikkarusussusai naapertuuppat?
- Aningaasaliinissamut pilersaarut: Aningaasaqarnermut pilersaarut piviusorsiorpalaarpa?
- Tamakkiisumik isiginninneq: Isumassarsiaq ataqatigiippa, isumaqarluarpa suliaalluarlunilu?
Sukumiisut: Qinnuteqaatit naleqquttut peqataasussat amerlassusiligaanerannut sanilliullugu amerlaneruppata, pitsaanerusutut nalilersukkat toqqarneqassapput.
Nalileeriaaseq
- Screening: Qinnuteqaatit tamaasa toqqaanissamut aalajangiisartunit misissorneqassapput
- Itisiliineq: Qinnuteqaammi itisiliisoqarnissaanik pisariaqartitsisoqalissappat qinnuteqartut pineqartut attavigineqarumaarput.
- Inaarutaasumik toqqaanerit: Inaarutaasumik aalajangernissaq allakkatigut qinnuteqaat aallaaviussaaq. Itisiliisoqarnissaanik pisariaqartitsisoqalissagaluarpat allakkatigut qinnuteqaat tunngavigalugu aalajangiisoqassaaq, immaqalu ataatsimiinnertalimmik.
Qaqugu akissutisissavit?
Qinnuteqartut tamarmik paasitinneqarumaarput toqqaanissamut ingerlaariaaseq 16. januar 2026-mi naammassereerpat
Peqataasussatut toqqakkat ingerlatsinissamut paasissutissanik nassitsivigineqassapput.
IKUMA pillugu
IKUMA pillugu
IKUMA Kalaallit Nunaanni suliffeqarfinnut aallartisartunut neqeroorutaavoq Nalik Ventures-imit ingerlanneqartoq. Nuna tamakkerlugu ineriartuutissatut ingerlatsinerit aaqqissukkat tunaartaqarfiusullu aallaavigalugit aallarnissaaneq pitsanngorsassallugu IKUMA-p suliniutigaa.
Ingerlatsinermi siullermi takornariaqarnermut suliassaqarfimmut tunngatillugu itisiliisoqassaaq, suliassaqarfik taanna allisaanissamut, suliffissaqartitsilernissamut nutaanillu misigisassanut periarfissaqarfiulluarmat.
IKUMA-mut takornaqariaqarnermut qulequtsiineq tassaaginnarpoq ingerlataq siulleq. Aaqqissuussaq annertunerusumik sammineqarsinnaavoq naleqqussarneqarlunilu, taamaasilluni Kalaallit Nunaanni suliassaqarfiit allat pillugit nutaanik ingerlatsisoqarsinnaanissaanik aaqqissuussisoqarsinnaalluni, inuiaqatigiinni pisariaqartitat suunersut apeqqutaaginnarput.
Takorluugaq
IKUMA-mut takorluugaavoq suliffeqarfinnik isumassarsiat inerisassallugit aallarnisaasutut ingerlatsinikkut, tassani Kalaallit Nunaanni aallarnisaasut nutaat suliffeqarfinnik ingerlalluartussanik pilersitsinissaannut pitsaanerpaamik periarfissinnissaat siunertaavoq.
Ingerlatsinermi siullermi takornariaqarnermut suliassaqarfimmi ineriartornermut tunngatillugu takorluugaq tassaavoq allisaanissaq ineriartornissarlu, tassuunatigulllu Kalaallit Nunaanni inuussutissarsiornikkut ineriartorneq siammasinnerusup angunissaanut tapeeqataasinnaalluni.
Periuseq
IKUMA annermik attaveqaatit atorlugit aaqqissuussilluni ingerlatsinermik periuseqassaaq, tamatumunnga tunngaviupput peqataasussat Kalaallit Nunaanni sumiiffinni assigiinngitsuneersuunerat, attaveqaasersuutit kiisalu ataqatigiissaarinikkullu pissutsit. Periuseq immikkoortunik pingaarnernut pingasunit aallaaveqarpoq:
- Ineriartortitsinermi ingerlatsinerit eqaatsut digitaliusullu, taamaasilluni nunap suaneersuuneq apeqqutaanani peqataanissamut periarfissiisoqarluni.
- Piginnaasanik, nukissanik attaveqaatinillu pitsanngorsaanerit qulequttanik sammisaqarnikkut, workshoppernikkut ataasiakkaarillunilu avitseqatigiilluni oqaloqatigiittarnikkut.
- Inuussutissarsiortut suliassaqarfinnillu sulissisisullu qanimut peqataatillugit, taakku paasissutissanik pitsaasunik suliassaqarfimmillu misilittakkat pillugit tapiisinnaaniassammata.
Apeqqutissaqaruit attavissat:
Augusta Lundblad
all@nalik.gl
Eller
nalik@nalik.gl +299701020
