Nalik Ventures A/S 2024-mi 28,7 mio. kr.-nik sinneqartoorpoq, ukiup siuliani 4,4mio kr.-miissimasumiit siuariarnerulluni. Siulersuisut angusaq naammagisimaarpaat, ingerlatseqatigiiffiullu nunatsinni inuussutissarsiornikkut nukittorsaanissamut periusissiaq nutaaq ingerlanneqarsimaneraniit angusatut isigalugu.
Nunatsinni aallarnisaasunut namminersorlutillu inuussutissarsiuteqartunut toqqaannarnerusumik attaveqarneq immikkut isiginiagassaq
Ukiumut angusat nunarput tamakkerlugu aallarnisaanermi inuussutissarsiornermilu nutaaliorneq ineriartortitsinerlu anguniarlugit sulinermut annertusaanissamut tunngaviliissaaq. Aallarnisaasunut inuussutissarsiortunullu siunnersuinikkut, pikkorissaanikkut aammalu suleqatigiinnerunissaq aqqutigalugit ataavarnerusumik attaveqarnissaq immikkut isiginiarneqassaaq. Nalik suli attavissaanerulersinneqassooq, aningaasaliissutinut ajornannginnerusumik periarfissiinissaq anguniagaavoq – aamma sineriatsinni inoqarfiit mikinerusut eqqarsaatigalugit.
”Nunatsinni aallarnisaasut suliffeqarfiillu suliniutit nutaat aqqutigalugit, suleqatiginerisigut aammalu nunat tamalaat akornanni attaveqaatit amerliartortinnerisigut kaammattornissaanut angusarput nukissanik tunisivoq. Ineriartortitsinerput pitsaasoq tamanna sanarfeqqinnissaanut qilanaarpugut,” pisortaaneq Thomas ’Tyt’ Mogensen oqarpoq nangillunilu:
”2024 ingerlanerinnaani inuit suliffeqarfiillu 400-ut sinnerlugit siunnersuinikkut, Aallarnisaasunut taarsigassarsianik, Nioqqutissiornikkut ineriartortitsinissamut tapiissutinik, EU-aningaasaliissutaanik imaluunniit atorniarnikkut aningaasaliiffigitinnernik Nalik aqqutigalugu pissarsisimapput. Tullernguupporlu nuna tamakkerlugu inuussutissarsiornerup nukittorserneranut sulinerput nangeqqissallugu.”
Siunissami suleriaqqinnissamut Advisory Board pingaarutilimmik inissisimassaaq, nunatsinni kommuniniit inuussutissarsiornikkut siunnersorteqarfiusut, immikkoortortaminni aningaasaqarnikkut siuarsaaqataasut aammalu aallarnisaanikkut nukittorsaaqataasut, taamatuttaarlu Nalik Ventures immikkoortortanut attaveqarnerminni akunnermiliuttui. Advisory Board piffimmi malinnaatitsineq, ilisimasanik avitseqateqarneq aammalu suliniutinut malitseqartitsinernik qulakkeerinnittarpoq, nunatsinnilu siuariartortitsinissamut aaliangiisooqataalluinnarlutik.
”Suleqatigiinnerup ingerlateqqinnissaanut qilanaarpugut” Thomas ’Tyt’ Mogensen naggasiivoq.
Sineriak tamaat isiginiarneqassaaq
Inuussutissarsiornikkut siuarsaaniarneq ingerlareersup avataasigut Nalik Ventures 2024 ingerlanerani periusissiornikkut suliniutit marluk aallartisarsimavai: Capacity Facility (EU suleqatigalugu sineriak tamaat inuussutissarsiornikkut siuariartortitsinissamut suliniut) aammalu Siuarta (Visit Greenland suleqatigalugu piffinni inuussutissarsiornikkut takornariaqarnikkullu ineriartortitsineq) – nuna tamakkerlugu siuariartortitsinissaq suliniutini taakkunani siunertaalluni.
Suliniutit taakku illoqarfinni aammalu piffinni periarfissatigut tigulluarneqarfiusimanngitsuni nukittorsaaqataalernissamik siunertaqarput.
Siunissaq ungasinnerusoq isigalugu suleqatigiinnissamut isumaqatigiinnerit aammalu piffiit tikillugit ornigulluni nukittorsaaqataaneq siuariartortitsinissamut, suliffissanik pilersitsininernut aammalu imminut nammassinnaasumik aallarnisaaneq taamaasilluni periarfissiuunneqarpoq. Suliniutit eqqaaneqartut paasisaqarfiginerorusukkukkit nittartagarput www.nalik.gl iserfigalugu paasisaqarnerusinnaavutit.
